الشروط والسياسات

الشروط والأحكام

الخدمة

AT-Panel لوحة إدارة لسيرفرات FiveM تشتغل كاشتراك على الإنترنت. نستضيف اللوحة على خوادمنا، وأنت تركّب سكربت الربط في سيرفرك، واللوحة تعرض وتنفّذ أوامر الإدارة من خلاله.

الحساب

• تدخل بحساب الديسكورد أو بحساب نسويه لك، وأنت مسؤول عن حماية حسابك ومفتاح الربط حق سيرفرك.
• التحقق بخطوتين إجباري لأصحاب السيرفرات وطواقمهم، وكل عملية في اللوحة تنسجل باسم اللي سواها.

الاشتراك والتجديد

• الاشتراك مدفوع مقدماً للمدة اللي تختارها (شهر أو أكثر)، والأسعار المعروضة في الموقع هي المعتمدة وقت الدفع.
• ما نسحب منك أي مبلغ تلقائياً. التجديد يكون بطلبك من «اشتراكاتي»، ونذكّرك قبل الانتهاء.
• لو رقّيت أو غيّرت باقتك، الأيام الباقية تتحول للباقة الجديدة بقيمتها.
• لو انتهى الاشتراك تنقفل اللوحة، وبيانات سيرفرك تبقى محفوظة وترجع لك كاملة أول ما تجدد.

الاستخدام المسموح

• ممنوع استخدام اللوحة في أي شي مخالف للأنظمة، أو في الغش، أو لإيذاء اللاعبين أو سرقة بياناتهم.
• ممنوع محاولة اختراق اللوحة أو التحايل على حدود الباقات أو مشاركة الحساب بشكل يضر الخدمة.
• نحتفظ بحق إيقاف أي سيرفر يخالف هذي الشروط، وتقدر تتواصل معنا لمراجعة القرار.

التوفر والمسؤولية

• نبذل جهدنا عشان تكون اللوحة شغّالة دايماً، مع نسخ احتياطية دورية حسب باقتك. وممكن تصير توقفات قصيرة للتحديث أو لأسباب خارجة عن إرادتنا.
• اللوحة أداة إدارة، وقرارات الإدارة داخل سيرفرك مسؤولية أصحاب السيرفر وطاقمه.

التعديلات

ممكن نحدّث هذي الشروط، ونكتب تاريخ آخر تحديث فوق. استمرارك في الاستخدام بعد التحديث يعني موافقتك عليه.

سياسة الاسترجاع

• أول اشتراك: لو ما قدرنا نشغّل اللوحة على سيرفرك خلال 3 أيام من الدفع، بعد ما حاول فريق الدعم معك، ترجع لك فلوسك كاملة.
• التجديد والترقية: ما ينسترجع، لأنه لخدمة شغّالة عندك.
• كيف تطلبه: تواصل معنا واذكر رقم الفاتورة (يطلع لك في «فواتيري»).
• طريقة الإرجاع: يرجع المبلغ لنفس وسيلة الدفع عن طريق Paylink، وعادة يوصل خلال 7 إلى 14 يوم عمل حسب البنك.
• لو انوقف السيرفر بسبب مخالفة الشروط، ما يسري عليه الاسترجاع.

سياسة الخصوصية

وش نجمع؟

• حسابك: معرّف الديسكورد واسمه وصورته، أو اسم المستخدم لو دخلت بحساب عادي.
• الدفع: رقم جوالك عشان إيصال Paylink، ومعلومات الفاتورة. ما نشوف ولا نخزّن بيانات بطاقتك، الدفع كله يصير في صفحة Paylink.
• الأمان: عنوان الـ IP ووقت الدخول، ونحفظها في سجل العمليات لحماية الحسابات.
• بيانات سيرفرك: اللي يرسلها سكربت الربط عشان تشتغل اللوحة، مثل أسماء اللاعبين ومعرّفاتهم وشخصياتهم وشنطهم وسياراتهم وسجل الإدارة. وهذي تخص سيرفرك وما تنعرض لأحد برّا طاقمك.

وش نسوي فيها؟

• نستخدمها بس عشان نشغّل اللوحة ونحميها ونتواصل معك بخصوص اشتراكك.
• ما نبيع بياناتك ولا نشاركها مع أي جهة، إلا Paylink لإتمام الدفع، أو لو طلبتها جهة رسمية بشكل نظامي.
• البيانات محفوظة على خوادمنا خلف حماية كلاود فلير، والاتصال كله مشفّر.

حقوقك

تقدر تطلب نسخة من بياناتك أو حذفها في أي وقت عن طريق التواصل معنا.

التواصل

أي سؤال، أو مشكلة في الدفع، أو طلب استرجاع، أو طلب حذف بيانات:

افتح تذكرة دعم للوحة انضم لسيرفرنا في الديسكورد

مقدّم الخدمة: AT Development.